PARUNDIANGAN

PARUNDIANGAN TARAGAK TAKANA

SIPANGKA :

Ma…., SUTAN MUDO..! NAK BARUNDIANG SAPATAH

SIBONDONG :

KA AMBO SUTAN MUDO..!

DITITIAK BAK UJAN, DIINGGOK BAK LANGAU, DIKATO NAN KABAJAWEK, DI GAYUANG NAN KABASAMBUIK ( … BIASO….. ) SINGKEK BAULAI, KURANG BATUKUAK ( … DALAM ADAT …. ), SABUIKLAH SUTAN MUDO.

SIPANGKA :

SABALUN PARUNDIANGAN AMBO TIBOAN KABAKEH SUTAN MUDO, KARANO KITO KABARUNDIANG DIHADAPAN NINIAK MAMAK RANG 10, SARATO DUNSANAK SALINGKA DUDUAK, RELA JO MAAF KITO PINTO PADO BALIAU.

SAMBAH MANYAMBAH KITO PULANGAN KAPADO ALLAH, SHALAWAT JO SALAM KITO KIRIMAN KAPADO NABI, BUAH PARUNDIANGAN TIBO KABAKEH SUTAN MUDO.

NAN KAMANJADI PARUNDIANGAN DI AMBO KAPADO SUTAN MUDO KINI, PANJANG BAKAREK SINGKEK BAPAKAI ARATINYO BASINGKEK-SINGKEK, ALAH NAN KASINGKEKNYO

MAAGAK I DIARI NAN KAPATANG DI SILANG NAN BAPANGKA KARAJO NAN BAPOKOK, HARI BAIAK KATIKO ELOK, MANCABIAK SIRIAH MANGGATOK PINANG, MALAPEH JUARO KAHILIA KAMUDIAK KATANGAH KATAPI, MAMBAWOKAN ROKOK NAN SABATANG, SIRIAH NAN SAKAPUA, MANIBOAN KABAKEH NINIAK MAMAK RANG NAN 10 SARATO KARIAK KABIA, IPA BISAN SARATO URANG BAKORONG BAKAMPUANG.

BAA DI URANG SADO ITU JANJI ALAH BAKARANG, PADAN ALAH BAUKUA,BAA DIHARI KINI HARI BAIK KATIKO ELOK, JANJI BAKARANG BADAPATI, IKARA BAMULIAN, LABOAH BAGOLONG LAH BATAMPUAH PASA JALAN LAH BATURUIK.

LAH TIBO CANDO DILAMAN TANGGO, JANJANG SAMO DITINGKEK, BANDUA SAMO DILAMIAK LAH LALU KARUANG TANGAH, BASALAM BAJAWEK TANGAN, LAPIAK TAKAMBANG LAH BAKADUDUK I.

DIPANDANG DUDUAK LAH SAHEDARAN SELO, DIPANDANG TAGAKLAH SAHAMPARAN TAPAK, ROKOK BAGILIANG LAH BAISOK.

PUN BAATONYO LAI..! PARUNDIANGAN NAN AMBO TIBOAN KABAKEH SUTAN MUDO, SUPAYO SIANG JAN BAHABIH HARI, MALAM JAN BAHBIH MINYAK, KARANO LAI NAN TARAGAK TAKANA DI KAMI SILANG NAN BAPANGKA KARAJO NAN BAPOKOK, ALAH PATUIK KADIKATANGAHAN, ASO ALAH KADUO BALUN,.SAKIAN PARUNDIANGAN AMBO TIBOAN KABAKEH SUTAN MUDO..!

JAWABAN ( BUAH BARINYO )

SABONDONG :

SAMPAI SUTAN MUDO..! ( DIULANG PARUNDIANGAN DIATAS ).

SAPANJANG PARUNDIANGAN NAN KATANGAH DI KITO NAN BAADOK BATUNGGALAN, SAIRIANG NAK BATUKA JALAN, SAIYO NAN BATUKA SABUIK NAN RAJO KATO MUFAKAT NAN BANA KATO BAIYO, AMBO BAWOK PULO KATO SUTAN MUDO JO MUFAKAT LAI DIKANDUANG ADAT DIKANDUANG PUSAKO, KATO DI BAWOK JO MUFAKAT.

SIPANGKA :

SUPAYO BIYANG NAK CABIAK, GANTIANG NAK PUTUIH, BAWOKLAH KATO JO MUFAKAT LAH ADAT LAMO PUSAKO USANG NAN MANGANDUANG SUTAN MUDO.

SABANDONG :

( DIBAWOK BAIYO )

MA SUTAN MUDO..! PARUNDIANGAN KAMBALI……

DIHARI NAN SABANTA KO RUNDIANGAN SUTAN MUDO LAH AMBO BAWOK BAIYO KABAKEH NINIAK MAMAK RANG 10 SARATO NAN SABONDONG LALU SAGANJO SURUIK

MANCARI BULEK NAN SAGOLEK PICAK NAN SATAPIAK, RUPONYO BULEKLAH BISA DIGOLEKKAN, PICAK LAH BISA DILAYANGKAN DIBALIAU MAANTAAN KABAKEH AMBO, DIAMBO MAANTAAN PULO KAPADO SUTAN MUDO.

ALAH KAANTANYO..!

KARANO LAI NAN TARAGAK TAKANA DI SILANG NAN BAPANGKA KARAJO NAN BAPOKOK KATANGAHANLAH… KO LAH BUAH BARINYO.